Update


Smá update hér. Litli kútur er kominn í fullt fæði... þ.e. brjóstamjólk og ekkert í æð. Nálin var tekin í morgun. Hann er einnig laus úr Sipap-inu núna og gengur bara mjög vel að anda án þess. Það var þó tekin blóðprufa í hádeginu og á eftir að koma í ljós hvort að hann þurfi að fara í ljós aftur (v/gulunnar).
Ég er búin að fá að halda á honum núna þrjá daga í röð. Tími eiginlega aldrei að láta hann frá mér aftur... en verð víst að gera það til að geta mjólkað mig... sem þarf víst að gerast á þriggja tíma fresti allan sólarhringinn. En kútur fær bara að koma í fangið á mér einu sinni á dag.
Það kom svo læknir að tala við mig áðan og biðja um leyfi til að nota Litla kút í rannsóknarverkefni. Það hefur alltaf vantað að fá heilbrigðan fyrirbura til að rannsaka. Hann útskýrði þetta voða vel fyrir mér og ég sé ekkert því til fyrirstöðu. Er þó með pappíra sem ég skoða þegar ég fer heim í kvöld... og að sjálfsögðu er ég með fleiri pappíra til að undirrita þar sem allt þarf að sjálfsögðu að vera á pappírum.

Jæja hef það ekki lengra í bili... er enn á spítalanum og verð hér fram á kvöld. Ætla núna að kíkja aftur á kútinn minn og undirbúa máltíðina hans... en hann á að fá mjólk núna kl. 16.
Þetta skrifaði Gulla kl. 15:39

 
Litli prinsinn


Litli bumbubúinn minn var að flýta sér svo svakalega mikið í heiminn. Hann fæddist 23.03.2008 kl. 22:07 rúmum 11 vikum fyrir áætlaðan fæðingardag.
Hann var 6 merkur (1510 gr) og 41 cm. Stór strákur og vel yfir meðallagi miðað við meðgöngulengd (meðaltalið um 4 merkur).
Vaknaði á páskadagsmorgun með örlitla verki sem ágerðust svo þegar ég var í sturtu þá um morguninn. Verkirnir hættu svo en litlu seinna fann ég að það var farið að blæða. Var komin á FSA fyrir hádegi og þá var bara komin full útvíkkun og því ekkert hægt að stöðva fæðinguna. Náði að halda honum í mér í 10 tíma án þess að rembast.. en þá líka kom hann út í þremur rembingum.
Vorum svo flutt suður, með sjúkraflugi, í hádeginu á annan í páskum. Hann hefur spjarað sig alveg ótrúlega vel og braggast hratt. Var ekki í öndunarvélinni nema í ca sólarhring og er núna einnig búinn að losna við auka súrefnispústið sem hann var með. Og alltaf verið að vinna í því að auka mjólkurmagnið sem hann fær. Hann er þó ennþá með sondu ofan í magann (sem hann fær mjólkina í gegnum) og verður það í einhvern tíma.
En jæja vildi bara láta vita af mér og mínum :)... en núna er víst kominn mjaltartími og læt ég það sitja fyrir öllu.
Þetta skrifaði Gulla kl. 23:28

 
27 vikur komnar


Sléttar 27 vikur komnar í gær. Og því tekin ný bumbumynd.
Súlí vinkona var svo væn að taka þessa mynd fyrir mig. Hún kom nefnilega og gisti hjá mér í gærkvöldi... og þessvegna henti ég myndinni ekki inn í gærkvöldi...hehe.
Við kjöftuðum að sjálfsögðu langt fram á nótt og var það því þreytt Gulla sem mætti í vinnuna í morgun.
Fór á þriðjudaginn og skipti um bíl við Kalla. Hann er að setja toyotuna í viðgerð og svo verður hún sennilega bara seld. Bíllinn sem ég fékk var hinsvegar svo drullugur að ég fór og þvoði hann í gær. Var samt ekkert voðalega glöð að verki loknu því að það þarf augljóslega eitthvað meira en kúst og vatn til að þrífa bílinn... og svo var ég alveg rennandi blaut því að það bunaði hér og þar úr slöngunni sem var við þennan blessaða þvottakúst sem ég notaði.
Well... er í vinnunni og þarf því að halda áfram að vinna. Vildi bara henda inn nýrri mynd.
Þetta skrifaði Gulla kl. 09:50

 
Árshátíð Símans


Árshátíð Símans var haldin í gærkvöldi. Rosalega flott að vanda. Gulla og Daddi, úr Stelpunum, voru veislustjórar. Garðar Thor Cortes söng fyrir okkur, Sprengjuhöllin spilaði og svo var það Páll Óskar sem að sá um að DJ-ast að borðhaldi og öðrum skemmtiatriðum loknum.
Ég fór þó heim um kl. 1:30. Var þá alveg búin á því. Stuðið átti þó að standa til kl 2. En ég var alveg búin í fótunum og bumbunni. Andinn hefði hinsvegar alveg verið til í að halda áfram...hehehe.

Undirbúningurinn fyrir árshátíðina er líka búinn að taka smá tíma..hehehe. Það var ekki fyrr en á fimmtudaginn sem ég var komin með kjólinn sem ég fór í. Gulla (í vinnunni) var svo elskuleg að lána mér nokkra kjóla sem ég gat valið úr. Og svo má ég hafa þessa kjóla áfram í láni þar sem þeir eru of stórir á hana... en komast allavega ennþá utan um bumbuna á mér.
Selma vinkona litaði á mér hárið á fimmtudagskvöldið. Skrapp til þeirra Péturs í mat og litun. Bara lúksus... þau eru alveg yndisleg.
Og svo var það hún Freyja mín sem að hjálpaði mér við að bera á mig brúnkukremið. Það gekk þó ekkert betur en venjulega og varð ég svoltið flekkótt... mér er bara einfaldlega ekki ætlað að nota brúnkukrem. Ætti bara að halda mig við ljósabekkina. En þar sem það er ekkert voðalega vinsælt að ófrískar konur fari í ljós þá hef ég ekki gert það og ákvað að nota þessa aðferðina. Í augnablikinu geri ég ekki ráð fyrir að eignast fleiri börn, þannig að ég ætti ekki að þurfa að lenda í þessum aðstæðum aftur. Verð bara hvít um páskana... og svo er nú ekkert svo svakalega langt þangað til ég unga þessu kríli út. Verður vonandi gott sumar þannig að ég verði bara brún úti í sólinni með litla kút.
Kíkti á ömmu Góu á föstudagskvöldið, áður en ég fór í brúnkuna til Freyju. Hún var að passa Rúnar Mar hennar Regínu frænku. Angela og Gulli voru reyndar hjá henni þegar ég kom... en fóru eiginlega strax. Þannig að við amma vorum bara að spjalla... Rúnar var reyndar ekkert á því að fara að sofa... þ.e. vildi bara að amma væri inni í herberginu hjá sér...hehe...virtist einhvernveginn alltaf rumska þegar hún fór fram. En það gekk þó að lokum.
Dagurinn í gær var svo bara rólegur þar til ég fór í sturtu og hoppaði heim til Jónínu fyrir fyrirpartýið...hehehe. Var búin að greiða mér og klæða áður en ég fór til Jónínu... en málaði mig þar. Spurning samt hvort að ég hafi skammast mín fyrir mína einföldu (ekki) greiðslu og látlausu förðun... þegar hinar stelpurnar voru búnar að vera í greiðslu og förðun. En ég er hvort eð er vön að gera þetta alltaf sjálf... nema Gugga, systir Kalla, greiddi mér í fyrra. Og Júlía vinkona hjálpaði mér nú einhverntíman líka... ætli það hafi ekki verið fyrir árshátíð mína nr 2 hjá Símanum. Annars hef ég nú yfirleitt ekkert verið að hafa miklar áhyggjur af þessu. Það var líka í fyrsta skipti í fyrra sem ég fór í kjól á árshátíðina...hehe... hafði fram að því ekki verið mikil kjólamanneskja.

En látum þetta gott heita... ætla að hendast í sturtu áður en Sissi kemur að sýna mér kerruvagninn sem ég ætla sennilega að kaupa af honum...ja eða einhver að kaupa fyrir mig af honum...hehe.
Þetta skrifaði Gulla kl. 09:40

 
Hálfnuð frá þeim tíma sem ég vissi....

Já já nú eru 14 vikur síðan ég uppgötvaði að ég væri ófrísk og 14 vikur í settan dag.
Tíminn flýgur alveg áfram og ég bara skil ekkert í þessu.
Við Freyja systir fórum á föstudaginn í smá búðaráp. Freyja keypti handa mér óléttugallabuxur. Og svo fórum við á kaffihús.
Á laugardaginn fór ég svo í vax upp á Kjalarnes..aha.. mér tókst að rata.
Og um kvöldið fór ég í partý í Mosó.... tókst líka að rata þangað. Þannig að þetta var svona rati dagur fyrir Gullu litlu. Kom ekki heim fyrr en uppúr kl. 3... þegar ég var búin að fara tvær ferðir niður í bæ.
Var að komast að því hversvegna það er alltaf svona mikil spenna í bumbunni minni. Það er sennilega af því að ég var í of góðu formi... þ.e. með of sterka magavöðva. Og þeir eru ekki sáttir við að gefa eftir. Þannig að það er eilíf barátta á milli bumbukúts, sem vill meira pláss, og magavöðvanna sem vilja ekki gefa eftir. Verð þá bara vonandi fljótari að jafna mig eftir fæðinguna.
Jæja spurning samt um að koma sér í bælið. Styttist í helgi og árshátíð og maður verður nú að vera vel hvíldur.
Þetta skrifaði Gulla kl. 23:05